FIRAISANA ARA-NOFY… (RRAG)

FIRAISANA ARA-NOFY…
Nitovy tsy nisy valaka,
tsy nisy fahasamihafana,
ny nofinao sy ny azy.
Nefa!
Toeran-droa misaraka,
tsy iray tanàna,
no misy anao misy azy.

Fa nofy tokam-pototra,
toa iray sompitra,
no niara-nivahiny,
iny alina iny.
Tan’efitranonao,
sy tan’efitranony.

Firaisana ara-nofy,
mari-bolamena,
mety tsy hiofo,
raha tsara fitefena.
Na toa koa ilavitra,
tsy ho resin-kalavirana,
ka mety mbola hanavotra,
‘reo fo tsy nahita izay nangirana.

Firaisana ara-nofy,
karoham-po mitosy,
hatramin’ny tsy hita maso,
mety hisy mpiankaso.
No nampiray indray,
‘lay fitiavana efa may,
‘zay efa toa lavenona,
hatramin’ny diam-penina.
RRAG
Jolay 2012
--------