HANGINA AHO KANEFA… (RRAG)

HANGINA AHO KANEFA…
Tiako loatra ianao,
tsy efako holanjaina,
tsy mba kilalao,
fa voka-po misaina.

Hangina aho kanefa,
raha toa tsy sitrakao,
‘ty fomba fiantefa,
azo hovaina ho vao.

Tiako loatra ianao,
tsy atakaloko hafa.
Eny hatramin’izao,
tsy mbola voafafa.

Hangina aho kanefa,
raha toa tsy ekenao,
ny handray tsy misy fetra,
ny fitiavako toy izao.

Hangina aho raha toa,
ianao tsy tia ahy.
Hampanginiko ny fo,
fa ianao aza manahy.

Hangina aho raha efa,
mitia olon-kafa ianao.
Kanefa, satriko hiantefa,
raha mbola ilainao.

Tiako loatra raha ianao,
atakaloko ny aiko.
Tiako loatra raha ianao,
ny antony dia tsy haiko.
RRAG
11 Jona 2012
--------