IRENY ISIKA… (RRAG)

IRENY ISIKA…
Ireny isika tsy nijery, tsy nitodika nitazana,
ny lasa iray ‘zay misitery, nisy ady tena mazana.
Mbola nahiratra ihany, na dia jamba nifampitantana,
ka nahanika ny avo, vao nitady fisandratana.

Ireny isika samy tia, toa tafita ho azy teny,
mpivady anefa izao ity, manjaka loatra ny eson-teny.
Mifanozona mihitsy, mifampiantsoantso tody,
nefa indrisy, fa mbola samy olo-mody.

Ireny isika nifanoroka, teo imason’ny tsy tia,
ankehitriny isika, menatra ny hiara-dia.
Noho ny kibo entinao, vidim-pitandremana,
‘lay hadalana vita mihitsy, no any zary nanenenana.

Ireny isika notenenina, toa nilonjilonjy fotsiny,
ankehitriny efa badenina, noho ny vesatry ny fihontsony.
Dia iza ihany no melohina, fa ny hadisoana ity toa vita?
Nahoana koa no mitsara, ireto olon-tsy nahita?

Ireny isika nanao voady, velirano tamin’ny fo,
dia niniana tamin’ny fasana, fa vonona hiara-droa.
Kinanjo sedra iray tsy nahy, dia nandrava ireo dina,
indray nipimaso, dia foana koa ny vina.

Ireny isika mba niaiky, fa hisy foana mpiankaso,
mety handatsaka tomany, mety hitondra ranomaso.
Fa niniantsika ireny, tsy mba notsaroana akory,
dia navelantsika hangina, navelantsika hatory.
RRAG
Jolay 2012
--------