LAHATRA SA TENDRY? (RRAG)

LAHATRA SA TENDRY?
Roa taona lasa izay, izaho sy ianao nifankatia!
Roa taona lasa izay, no nivoady hiara-dia!
Dia nivadika ny ora, nisosasosa ny fotoana,
niroso moramora, dia tinapitra ny taona.
Teny isika, samy tsy nisy nahalala,
samy mbola tia, samy mbola adaladala.

Saingy indrisy, fa nisy rivo-bao nandalo,
nisy mpivahiny, ren’ny fo injay nikalo,
nanaitaitra maso anao, ka niova ny fijery,
ianao nandeha nandao, izaho tavela irery.
Mizoga ràtram-po, milanja esoeson’ny hafa,
ny anao ny fitia, toa efa tsaratsara fafa.

Ka lahatra sa tendry, ity mianjera ho ahy?
Lahatra sa tendry, ity toa nampiahiahy?
Zary nanovaova maso, anao hitazana hafahafa,
sa ny lasa vita mihitsy, no minia ny mandràtra?
Roa taona lasa izay, toa nifankatia fatratra,
ny foko sy ny anao, nidinà ny hiara-sambatra.

Kinanjo! Ny pejy no nivadika, namadika tantara,
lohateny iray vaovao, no sora-niafara,
namaramarana ny vina, ‘zay mbola tsy tafita.
Lasa ianao, nanjavona tsy hita,
nanaraka mpandalo, toy ny tsipolitra,
dia izaho aty, mihazonazo-molotra,
diso fanantenana, tamin’ny toetranao,
variana ihany koa, nahita anao nandao.

Ka iza no ankahalaiko, ny foko sa ny anao?
Sa ny lahatra mihitsy, no fototry izao?
Ny tendry anefa ve, tsy manan-kolanjaina?
Raha toa ka isan’ny nitondra, ny herin’ity taraina?

Ka lahatra sa tendry, no tsy nanao ny asany?
Lahatra sa tendry, no antony hilefasany?
Ka nahatonga azy, nanova ny fijery,
ka namela ahy, hiadiady irery.
RRAG
Jolay 2012
--------