‘LAY ROVAN’NY NOFY… (RRAG)

‘LAY ROVAN’NY NOFY…
Tefim-bolamena, nasian-diamondra,
ho haingon’ny lapa, ny rafitra najary.
Tsy mavesa-danja, kanefa toa mafonja,
tsara kolokolo, vita soko-tsary.
Daliah sy raozy, mamela-mangakely,
no haingon-jaridaina, ravaka tanàna.
Fo ‘ray mitomany, tsy misy mba mijery,
manina ny eny, sady tsy tamana.

No indray mitsiaro, an’ilay olon-tiany,
efa niala aina, zary namam-pasana.
Nandao lapan’ny nofy, akaniny fahiny,
toerana voatokana, nifampiandrasana.

‘Lay rovan’ny nofy, akanim-pahatsiarovana,
irony kanto indrindra, nentin’ny tantara.
‘Lay rovan’ny nofy, saingy fandalovana,
misy fetra hatrany, toy ny anjara.
Tahiry toy ‘reo hira, fivetsom-po tomany!
Toy ‘reo tononkalo, zary naman-tany,
natototra tsy hifongatra, hanata-jaitran’aina.
Mba tsy hatratra intsony, fiposaky ny maraina!

Tefim-bolafotsy, nasiana safira,
no rava-baravarana, narafitra omaly.
Boky iray mirakitra, ireo tononkira,
no mbola voatahiry, anaty ferin-jaly.
Saingy, tsy mety raha fafàna,
fa hany tokan’aina, tsiahin’ny tantara.
Tsy levon’ny omaly, tsy ho ringan’ny ampitso,
tsy ho lo mihitsy, ary tsy hasiso.
RRAG
15 Janoary 2013
--------