NA DIA… (RRAG)

NA DIA…
Mbola zaza ianao mazàna,
dia faly ny hiditra am-piangonana.
Lehibe dia tsy tamana,
satria hoe: “Mamelon’ankohonana!”

Saingy ny tsy mba tsapanao,
dia ny Tompo teny foana.
Niaro sy nitahy anao,
ninoninona fotoana.

Sendra ady mafy anefa,
dia ‘njay miantso ‘lay anarana.
Fa angaha moa tsy nahefa,
ireo nohariana teo an-tanana?

Na izany nefa aloha,
tsy nanadino anao ny Tompo.
Fa ianao no mafy fo,
ka mikiry ny tsy hanompo.

Dia mitady hatrany hevitra,
tsy hanatona azy akaiky.
Moa ve mandry ny eritreritra,
raha toa ianao ka taraiky?

Tsy hahita fahafahana,
nosoritina hatry ny ela.
Tsy hahalala izay lalana,
f’ianao irery no tavela.

Ka faingana ianao mifona,
manatona azy izao.
Fa izy tia anao foana,
na dia mpanota aza ianao.
RRAG
14 Martsa 2018
--------