NAVALONA… (RRAG)
Pas encore lu
(Nalaina tao amin'ny vetso.serasera.org)
NAVALONA…Tiana hotsaroina, matetika isan’andro,
ny tsara nentin-dasa, nanova ny fiainana.
Satry ho hazavaina, ‘reo tsy hitan’ny masoandro,
ka nitondra ràtra, sy fanaintainana.
Tiana hotsaboina, ‘reo ferin’aina, mamatotra ny tena.
Hirina ny hivalona, ny pejin’ny andro ratsy!
Saingy efa nandrotika, nitondra faharesena,
ny ady an-taona maro, ‘zay tsapa ho ady mafy.
Navalona ny lasa, navadika ny pejy.
Dia nanoratra tantara, tanaty pejy vao.
Saingy ny omaly, no soritry ny tendry,
ho tsy afaka fafana, fa efa mitatao.
Navadika ny pejy, nasolo iray vaovao.
Ny haizin-dasa foana, no manaloka ny lanitra.
Navalona ny kendry, fa ny taloha tsy lao,
no vokatra naterany, ka tsy nahita hanitra.
Tiana ho voafafa, ny diam-penin-dasa.
Satry ho voavono, ‘reo tsiahy izay nandràtra.
Nefa efa tody, mifamatotra amin’ny aina.
Efa olo-mody, vao maro ny adin-tsaina!
RRAG
13 Janoary 2013
--------
Lien:
