NY VONINKAZO HONO MANTSY… (RRAG)

NY VONINKAZO HONO MANTSY…
Ny voninkazo hono mantsy,
voa miavaka sy tokana!
Mamelombelona ny anaty,
na dia ireo mihosim-potaka.

Ka koloy ho kanto hatrany,
ho rava-jaridaina.
Ho endri-kanton-tany,
hamafa ireo taraina!

Ny voninkazo hono mantsy,
no mosoara fanindroany!
Famafa ranomaso,
novokarin-tsetra sy ankaso.

Ka nanarona ny tava,
nandrava ‘lay tsikikeliny.
Tsy nety mba nisava,
ninia nanitatra ny feriny!

Ny voninkazo hono mantsy,
no ravaka miava-toetra!
Tsy misangisangy ratsy,
ka hoe hamingana sy hisetra.

Fa toa tokam-po ihany,
miendri-kaja samy voary.
Ilay mamafa ny tomany,
mandrakotra ny fiainan-tany!

Ny voninkazo hono mantsy,
soa avy amin’ilay Nahary!
Fanilom-po ‘zay miantsampy,
ka mitia tsy misy jaly!
RRAG
Febroary 2012
--------