PEJY VAOVAO… (RRAG)
Pas encore lu
(Nalaina tao amin'ny vetso.serasera.org)
PEJY VAOVAO…Efa ninian-tsy tsaroana, ny lasa efa vita!
Efa ninia-novonoina, ny fitiavantsika!
Efa ninia-navadika, ny pejy saingy indrisy,
fa tsy hisy izany, tena hoe tsy misy!
Na dia nivadika ny pejy, ka lohateny vaovao,
no handrafetana ny boky, dia ny ao am-ponao ao,
tsy nanadino velively, ny lalan-dasa nolalovany,
fa nitahiry ireny, tamim-pejim-pahatsiarovany!
Pejy vaovao, fa nofy omaly ihany!
Pejy vaovao, fa fery iray hatrany,
no mbola mampiray, mampitohy ny tantara!
Ka na hihodina ho aiza, dia efa io no anjara.
Na hototofana ny lasa, na hodorana ny pejy!
Na hovitaina ny kasa, na hivadika ny tendry!
Dia ny pejy mety hiova, fa ny fo tsy mba hanaiky,
ka hitomany ho anilanao, hitomany ny ho akaiky.
Pejy vaovao, fa tolo-nolovaina!
Zanaky ny lasa, no injao mamaky saina,
ka na hivadika aza, ny pejin’ny tantara,
dia tsarovy foana, fa ny aloky ny lasa,
sy ny setrasetrany, dia tsy hanam-piafara….
RRAG
Febroary 2012
--------
Lien:
