RAHA MBA MAHATSIARO IANAO… (RRAG)

RAHA MBA MAHATSIARO IANAO…
Banjino kely minitra iray,
na ora iray mihitsy aza,
ilay sary an-joron-trano,
tsiaron’ny afo izay nahamay.
Dia ‘lay navelan’itsy lasa,
ho fototry ny aim-baovao.
Tsisy dina, tsisy kasa,
fa ny ho eo anilanao.

Banjino iray minitra monja,
ilay sary efa tonta.
Omeo oroka mafonja,
aoka, aza hatontatonta.

Banjino kely raha sitrakao,
na ny masony ihany aza.
Banjino re, izao dieny izao,
mba banjino hatramin’ny tava.

Raha mba mahatsiaro ianao,
ilay akanjo tontako iny,
ataovy an-joron-trano ao,
mba ho tazan’ny vahiny.
Hahafahany manafatra,
ahy hiverina any haingana.
Mba ho tena teny lafatra,
no hitondra ahy ho faingana.

Raha mba mahatsiaro ihany ianao,
dia sokafy moramora,
ny varavarankely avara-trano,
fa any aho no hiditra hamonjy, ilay tokantrano.
RRAG
11 Jona 2012
--------