REHEFA MATY AHO… (RRAG)
Pas encore lu
(Nalaina tao amin'ny vetso.serasera.org)
REHEFA MATY AHO…Niadivako ny zo, hanafahako ny taniko.
Nokatsahiko ny soa, dia natolotro ny mamiko.
Nozaraiko ho an’ny Nosy, fireneko tsy hadino.
Mbola ho tafita ianao, ny foko aza mbola mino.
Nofatorako ny sedra, eny, na dia vetivety fotsiny.
Nobahanako ny setra, mba hanamaivana ny fihontsony.
Ny hakànao aina, no tanjoko ry firenena.
Ny hilaminanao saina, hiala anaty fanerena.
Rehefa maty aho, aza alevina akory,
aleo aho, amoron-dalana no hatory.
Raha toa ka tsy vitako, ny voadim-panekeko,
dia aleo ny sisin-dalana, no fasam-pahareseko.
Rehefa maty aho, aza avela handry akory,
tereo foana ny fanahiko, na hiaka sorisory,
ho tezitra aminao, ka hanampa-pahatezerana,
satria tsy efako ny voady, ka io no vidim-panenenana.
Azerao amiko, ry fireneko mamiko,
‘zay tanindrazana tsy foiko, tsy afaka ny hosoloiko.
Rehefa maty aho, dia azerao ho ahy ny tsiny.
Aza asiana indrafo, raha tsy vitako ny toky,
noraketiko an-tsoratra, voatahiry anaty boky.
Ilay diam-peniko voatokana, ho fato-maty ny fahiny!
Ka rehefa maty aho, aza atao tototany,
fa totofy akofa lo.
Satria tsy vitako ny adidy, ka aleo aho hitomany,
hatrany am-pasako any koa!
RRAG
Jolay 2012
--------
Lien:
