ROJOM-PITIA… (RRAG)
Pas encore lu
(Nalaina tao amin'ny vetso.serasera.org)
ROJOM-PITIA…Moa ny alitara ihany, no rojo afa-mamatotra,
fitia ‘zay novoadiana, teo anatrehan’ny lanitra?
Moa ny diam-penina, an-diarin’ny firaisana,
no hany tsy azo lavina, ny hampitondra faisana?
Samy rojom-pitia, fa hafa raha ny toky,
tsy voarakitra an-diary, tsy voatonta anaty boky.
Fa azom-po hotanana, hitamberina matetika,
hamaizana ‘reo maro namana, sady be fitetika.
Samy rojom-pitia ireo, fa ny voady voatanisa,
no indro ho fanilo, tsy hisian’ny disadisa,
na zavo-mainty hanarona, fitia notsinjaraina!
Koloy am-po mangina, rehefa hoe lalaina.
Moa ny vodiondry ihany, no fatotra hifanaovana?
Nefa, toa mbola misy aza, ny endrika fandaozana.
Ka ninona ho atao, rehefa ratsy fototra,
dia tsy ho ela intsony, dia ho ringana sy ho tototra,
ny fitia tinery, raha toa tsy voka-po.
Nanaovam-boady fotsiny, noho ny hamaivanan-doha!
Ny fitia dia tsy terena, raha hangina aloha ny fo!
Ny fitia lalim-paka, no taratra mahasoa.
Diniho mangina ihany, hevero izay ho fotony!
Ka ho rojom-pitia mirindra, mifanentana amin’ny tompony.
Samy rojom-pitia ireny, anjaranao no mandinika!
Safidio ‘zay tianao, dia avy eo ‘nareo midinika,
‘zay lalana hodiavina, tsy hisian’ilay fandaozana!
Dia ho akany mahafinaritra, miaina am-pihavaozana.
RRAG
11 Jona 2012
--------
Lien:
