SORI-DALANA VAOVAO… (RRAG)

SORI-DALANA VAOVAO…
Ry mpitondra fanjakana, mijaly loatra ‘zahay vahoaka.
Ny anareo ve no hadalana, dia ny vilany ‘ndray hapoaka?
Tsy hinananay madinika, sisasisa omenareo.
Ry mpitondra fanjakana, ‘zahay vahoaka mba jereo.

Ny kibonay ‘zao noana, te mba hinana ‘zay ambiny.
Nefa dia! Toy izao foana, tsy maintsy mila tambiny,
‘ty fizaràna sisa, aminay madinika,
ka tsy minana izahay, raha mikiry tsy midinika.

Ry mpitondra fanjakana, sao lahy ka diso mafy loatra,
ity kapoka atao, anaty eso sy hararaotra?
Ka hanangonana hatrany, ny hatsembohanay mahantra.
Miangatra e! Tena miangatra ny lanitra.

Fa ianareo tsy misasatra, mihinana ny nofony,
izahay aty an-tatatra, zara raha mahazo potipotiny.
Na koa mahita tsaratsara, fa tsy misy izay mba hena!
Ianareo anefa toa, any an-dafy no miantsena.

Fa aiza izay mba fitoviana, hoe niadianareo teo?
Aiza marina raha misy, maninona ary no tsy haseho?
Toa efa ela no niandrasana, niandrasanay izany.
Ento aty, fa ataonay lamba, famafana tomany!

Ry mpitondra, habobo lava, no afafy anay vahoaka!
Ianareo no mila vola, dia izahay no, fafazan-tsisa toaka,
hanamamoana ho tampona, tsy hanana hery enti-miady.
Leo ‘zahay, tena leo, ka aleo tapahana ny tady,
mifamatotra amintsika, raha toa ‘nareo ka tsy hahavita,
hanori-dalana vaovao, mba hahafahanay miampita.
RRAG
Jolay 2012
--------