TAMIN’INY… (FIZARANA FAHAROA) (RRAG)

TAMIN’INY… (FIZARANA FAHAROA)
Nitinazana an-tsiky dia, nibanjina ‘lay jery,
izay natopitopinao ka zary, nahatonga ahy nahateny,
hoe: “Malala a! Tiako ianao! Eny, tiako loatra ianao,
tiako loatra ka tsy ho vitako, ny handao ‘zao ora izao”.

Tsy haiko ny hanalavitra, fa tsy foiko‘ty angolangolanao,
ka dia nanery ahy ny foko, nanery ahy, hiantsampy anilanao.
Ianao izay, nandritsoka ny tenako, nanaitra ahy tan-tory!
Tiako loatra ianao, tiako loatra ka ny foko, tsy mety tony.

K’izay no namelako, hisafoanao, ny salovan-tavako,
ary koa nanekeko, hikasihan’ny molotrao, amin’ny vavako.
Izay no antony tsy nanakanako, hanalànao ny lamba an-koditro,
satria malala a! Tiako ho takatrao, ny hika farany todiko.

Dia nifampizara teny, toa tsy nahalala ora intsony,
malala a! Tamin’iny dia ianao, ianao no hany vony,
nifampizara hafanana, injay fa, nifanolotra fitia,
vony zary lasa felana, tsy fela-maina sanatria.

Tamin’iny tsy nahalala, andro hariva intsony isika,
marobe ‘reo hadalana, saingy mamy rehefa vita.
Zary fitomboka tsy maty, nosoritin’iny dia.
Malala a! Tamin’iny anie akia, no nivaky ilay fitia.
RRAG
01 Martsa 2018
--------