TARA-BOLANA MAIZIM-BOLANA…! (RRAG)

TARA-BOLANA MAIZIM-BOLANA…!
Eny ho eny angamba izao, misy nofy tsy niverina,
misy tsiky tsy hita intsony, zary noraofin’ny nenina,
ka niova ranomaso, sy alahelo tsy hay fefena,
eny ho eny no mitoetra, ilay fonjam-paharesena.

Misy antso tsy tafita, miriorio eny ho eny,
saingy ilavitra tsy tazana, ka tsy takatry ny jery,
dia misaona anaty sento, irony nosetrain’ny fiainana,
teny ho eny no lavo, ny Reny hany fitarainana.

Tara-bolana maizim-bolana, no manarona ny lanitra,
aiza ho aiza no mitopy, izato jerin’Andriamanitra?
Fa toa tsy natao hahita, ny sedran’ireo kamboty Reny,
haizin-kitroka no hany, natao fiainan’izy ireny.

Tara-bolana mangarika, maizim-bolana eny foana,
ranomaso sy alahelo, no iainany mandavataona,
ka eny ho eny no heveriny, hampitoniana irony ràtra,
nefa indrisy fa nitoetra, sy toa vao mainka nahazo laka.

Eny ho eny izao no misy, fifaliana antenaina,
hampitony ny fo, anaty izao adin-tsaina,
an-tara-bolana miangatra, an-kaizim-bolana mpanilika,
mbola antenaina ihany ve, fa hisy masoandro mba hibitsika?
RRAG
25 Jolay 2018
--------