TEREO, ASAIVO AVOAKANY AVY HATRANY… (RRAG)

TEREO, ASAIVO AVOAKANY AVY HATRANY…
Misotasota indray, minia ny mandrendrika,
ny firenena tokako, ireto fahavalony.
Mananika ny vohitra, sady toa manenjika,
‘reo gasy toa ahy, eto amin’ny taniny.

Injay nanani-dapa, nanongam-panjakana,
niseho ho tompon-daka, saingy tsy nahalala,
fa ilàna feom-bahoaka, ny fitantanam-pirenena,
ilàna fo madio, feno fanetren-tena.

Indreo nanjakazaka, nanao fahirano ny harena,
ireo niseho mpanjaka, sy nanambony tena.
Nitroatra ny vahoaka, nentin’ny fony,
nandositra nirifatra, dia tsy hita teny intsony.

Ka ho anareo mpitondra, jereo ‘zahay madinika,
raha misy fanapahana, asivo dinidinika.
Fa ‘ndrao hitroatra indray, ka ho romotra amin’ny azy,
raiso toy ny tena izy izany, fa aza atao hoe vazivazy.

Ny vahoaka no manapaka, tompom-pahefana,
izy no mandatsaka, ‘zay ho mpitondra fanjakana.
Jereo hatrany ireo, raha tiana hilamina ny tany,
sao haneno: “Ilay tereo, asaivo avoakany avy hatrany”.
RRAG
Jolay 2012
--------