TOKY FENO NOFY… (RRAG)
Pas encore lu
(Nalaina tao amin'ny vetso.serasera.org)
TOKY FENO NOFY…Na hitomany aza ianao, dia izao no mba tsarovy!
Fa tokim-bava ihany ireny, toy ny antso iray tsy tody,
izay natorany hiantefa, hiantefa taminao!
Toky feno nofy izany, fa izy lasa, efa lasana nandao!
Ka ny hany azo atao, dia ny mampitony fo!
Ny tokana azonao atao, dia ny mandamindamin-doha!
Fa raha ny tokiny ‘zay fitaka, efa tsy azonao iandrasana.
Ny nofiny aza anie tsy aiza e? Efa mandry any am-pasana.
Toky ny azy, toky fitaka, niezahany nahaita.
Saingy indrisy, ny tompony aza efa tsy hita.
Efa nitady lalam-bao, moramora hosedraina.
Ka nahasahy nandao anao, tan-kianja karakaina.
Izay kianjan’ny fitiavana, feno ahi-dratsy maro.
Feno sento, feno nofy, feno vetso mifangaro!
Kianjam-po midongy ho afaka, kianjan’alahelom-po.
Teo ny ranomasonao no nalatsaka, tan-kianjan’olon-droa!
Kianjan’olon-droa, feno ràtra, setrasetra!
Niniany nasiana, nasiana kajy arahim-petra!
Tsy hahafahanao hiteny, na haneho ny safidy.
Lazainy hoe mitapy ianao, mitady fitia lafo vidy.
Fitia lafo vidy, anaty toky feno nofy.
Miara-sambatra amin’ny tiany, eo no mitositosy!
Nefa indrisy, tena nofy, ary nofy tsy ho tanteraka.
Tahirim-po ihany sisa, tahirim-po mety handreraka!
RRAG
11 Jona 2012
--------
Lien:
