TSY TIAKO ‘ZANY IANAO… (RRAG)

TSY TIAKO ‘ZANY IANAO…
Ninoninona ho ambara, tsy tiako ‘zany ianao e!
Na ho lazaina hoe anjara, tsy ho tiako mihitsy ianao e!
Mafy loatra raha ny zoga, navelanao hoentiko!
Haizina miary fonja, no novetsoiko izay mba sentoko!

Tsy tiako ‘zany ianao, fa nanataka ny foko!
Tsy ho tiako mihitsy ianao, ‘lay namadika ny toky,
‘zay nafafinao ho ahy, otazana hahavoky!
Tsy tiako intsony ianao, saingy nefa toa tsy foiko.

Rehefa iny aho mahatsiaro, ilay lasa nolalovako.
Noteren’ny saiko hangina, ireny sisam-pahatsiarovako!
Mialokaloka maningana, injay miseho ho tompon-toerana!
Lasa ianao mandeha ry tiana, fa ampy izay ny fandeferana!

Toa tiako ihany ianao, ninoninona ho ambarako!
Tsy tiako ‘zany ianao, na dia tena hoe anjarako!
Tsy foiko anefa koa, ny hanadino ity fisiana,
‘zay mitahiry anaty pejy, mitahiry am-po mangina.

Na iza hilaza mihoatra, na iza koa hampatahotra?
Dia ny vavako mihitsy, no nanambara tsy niahotra,
fa tsy tiako ianao, na hoterena aza aho!
Tsy foiko ihany koa anefa, na dia foto-draorao.

Tsy tiako ‘zany ianao ny handao, fa tiako ianao hitoetra eto!
Tsy tiako mihitsy hiraorao, fa tiako ianao hamafa sento!
Hanafoana ny adin-tsaiko, sy hanefa izay lalaiko,
tiako ianao! Tsy tiako ‘zany, fa ‘zay tianao ho efaiko!

Tsy foiko fa tsy tiako, mantsy ianao ry tokana!
Toa satrisatriko eny foana, ho ahy! Ho ahy manokana!
Tsy hotsinjaraiko amin’izato, na hozaraiko amin’ny hafa!
Tsy tiako ‘zany ianao! Fa tiako ihany, hampanadino ahy ny lasa!
RRAG
11 Jona 2012
--------