VAVAKY NY FO… (RRAG)

VAVAKY NY FO…
Ry lanitra ao ambony, mba henoy kely,
‘ty vavaky ny foko, miantso mitalaho.
Eo re mba asio, mba asio jinery,
ny fitiavana mamatotra, fa sao dia raorao.

Ry lanitra ao ambony, tantano koa ny dia,
omeo fo iray manaja, omeo olon-tena tia.
Manaiky ny hizoga, ny ràtran’ny aiko,
hilanja ihany koa, ny fery entin-tsaiko.

Ry lanitra ao ambony, jereo ny fireneko!
Avelao hitony, fa io no fahalemeko.
Farito dieny izao, ny lalana holalovany,
sorito eo aminao, ny dingana horatovany,
izay hilàny ahy, hiara-dia aminy,
hanàla ny ahiahy, hamafa ny tomaniny.

Ry lanitra ao ambony, io ny tanindrazako!
Io re mba jereo, fa tokan’ny fitiavako.
Ka hitalahoako, raha toa ka sitrakao,
alao ilavitra azy, ny fiainan-draorao.

Ry lanitra ao ambony, mba henoy ihany,
ny vavaky ny foko, na tsy hisy valiny aza.
Fa izaho mino, fa indray andro any,
ny fireneko, hahita ny mazava.

Ka mbola hitalahoako, tsy handreraka ahy akory,
raha sitrakao dia hiaretako, hiaretako tory.
Hivavahako isak’alina, isan’andro mihitsy aza,
sanatria re ry lanitra, ny fireneko hanata-bava.
RRAG
Jolay 2012
--------