VONIN-DRAOZY HAFAKELY… (RRAG)
Pas encore lu
(Nalaina tao amin'ny vetso.serasera.org)
VONIN-DRAOZY HAFAKELY…Kanto sariaka, tsy miavona izany.
Meva bikàna, toa tokana an-tany.
Malemy paika, sady tia milefitra.
Mirana hatrany, ka tsy leo mandefitra!
Sakaizan’ny lolo, sy irony tantely.
Ny mason’ny tia, tsy sasa-mijery.
Fanantenan’ny resin’ny ady.
Ilay mpiarahaba vahiny, eo am-bavahady!
Fampitoniana ny fo izay ory,
resim-pitiavana ka tsy mahita tory!
Noenti-nitsinabo ny ràtra anaty,
ka nandevenana ny lasa efa maty!
Vonin-draozy hafakely ivom-pitsikiana,
famelombelon’ny fitiavan’ny tiana.
Sakaizan’ny osa, fanosiky ny aina,
vonin-draozy tokana, hany nantenaina!
RRAG
28 Septambra 2019
--------
Lien:
