1972… (RRAG)

1972…
Fanjakana toy ny ahoana, ity kendrena ho hajoro,
ka hamoizana aim-bahoaka, tsy hijerevana ny osa?
Fitondrana toy ny ahoana, fa ny finoana efa toro,
efa leo ny mangina, leo ny fandoavan-trosa?

Dia fitaovana hatrany, ny vahoaka madinika,
dikaina rehefa misy mamy, tsy omena na dia bitibitika.
Tsy izaràna na dia kely, tsy henoin-teny akory!
Ka nahoana izy ireny, no tsy hitroatra noho ny sory…?

Fanjakana toa akory, ity handravàna ny efa misy?
Sao dia fanjakan-devoly, ka ho nofy koa ny ampitso?
Ka na hiongana aza ny eo, ny hoavy toa tsy hitsitsy,
dia tsy aleo ve ‘zay teo, raha ny anio no hoe ampitso?

Toy ireny no nitranga, tamin’ny taona 1972.
Toy ireny no nitranga, tan-drenivohitr’Iarivo.
Ka maro ireo tanora, namoy aina tsy fidiny,
saingy indrisy tsy tsaroana, na dia ny aina namidiny,
ho fanavotam-pirenena, ilay nianjera anaty haizina.
Mbola maro tamin’ireo, no mbola mandry an-tranomaizina.

Ka mirongatra mandrava, ny hany kely antenainy,
ireo mpitondra nifanesy, tsy mbola nisy sahy niaiky,
fa zava-poana ny fahafahana, raha tsy sitrapom-bahoaka,
ka hijoro hatrany ireo, na basy aza no hipoaka.
RRAG
Aogositra 2012
--------