ANY IANAO… (RRAG)

ANY IANAO…
Mangatsiaka izato aliko,
ka mitanisa aho ny tsiaro,
izay nandrakotra ny omaliko,
tsy dia tiako ny hifangaro.

Any ianao any!
Asa! Mety koa nanadino!
Any ihany any!
Ny hahatsiaro, toa tsy hampino!

Any ianao,
eny an-tratran’olon-kafa!
Toa variana milalao,
dia nanadino irony lasa.
Any moa ianao,
tsy ho resin-tambitamby i?
Ka nahavita ny nandao,
satria tokoa efa tsara mpiandry!

Mangatsiaka ity ny aliko,
hitanisàna irony vita,
tan-dranomason’ny omaliko,
ka ankehitriny toa tsy ritra!

Any ianao toa ravoravo,
tsy mahatsiaro ahy intsony!
Toa hoe tafanika ny avo,
fa namabo izany fony.
Nefa, izaho toa tsy matory,
miandry anao ny mba hiverina.
Na dia tsy sitrako akory,
dia zary fery nampanenina,
ilay fotoana, niandrasako anao.
RRAG
Aprily 2012
--------