FINGANA LAVA… (RRAG)

FINGANA LAVA…
Nihafiana ny lasa, nefa tsy tony.
Fingana lava, no atao amin’ny fony.
Navela ny lasa, mba homba ny lasa.
Fingana lava, no nandefena kasa.

Fingana lava, tsy hiato mihitsy.
Ankason’ny hafa, modian-tsy nisy.
Injay mitamberina, mandrotika fo.
Mandrava ny vao, ny efa taloha.

Fingana lava, tsy misy nahoana.
Fingana lava, tsy misy fiatoana.
Sangy mahery, mety hahafaty.
Fingana lava, nanindrona ny aty.

Dia hita ny omaly, fa io mitamberina.
Hikan’ny omaly, no injao mankarenina.
Fa fingan’ny omaly, ity re miverina.
Fingana lava, zary efa nenina.

Raha eso na latsa, moa tsy hozakaina?
Fa ‘ty fingana ity, toa mampitaraina.
Efa tsy tanty, tsy tantin’ny tena.
Nefa ho lanjaina, ary mbola terena.

Fingana lava, toa mbola ‘lay omaly.
Fingana lava, no injao mampijaly.
Minia misangodina, mamingana ny aina.
Iza anefa? Iza, no azo antenaina?

Fingana lava, toa zoga tsy zaka.
Loto an-tava, miampy ny ràtra.
Mbola tsy voafafa, eny amin’ny endrika.
Dia indro mandodona, fa maika ny handrendrika.
RRAG
11 Jona 2012
--------