FO VOAHITSAKA… (RRAG)

FO VOAHITSAKA…
Tsy vita ny natosika, hiala ilavi-tiana!
Fa mbola nesoina, ny hany faniriana!
Vao mainka indray koa, hitsahina ho repotra.
Tsy namelana mihitsy, raha tsy tena sempotra!
Dia ‘ndrao no niafarany, poritra sy toro!
Nosakanana avokoa, ireo naniry hikolo.

Fo voahitsakitsaka, drodroka sy reraky ny ditra.
Mamery ka tsy sahy, intsony hisedra disadisa.
Ry tanjaka sy hery, nandao tanteraka ny aina.
Ny ampitso koa tsy hay, satria tsy takatry ny saina.

Fo voahitsakitsaka, marary ihany fa hihafiana!
Voatsindron’ny lasa, fahoriana e! Fijaliana!
Nefa ny ferin’aina, miahy mamatotran’ny tena.
Ny adim-po no ady sarotra, hanjakan’ny faharesena!

Tsy vita ny nitsoaka adidy, na nandositra andraikitra!
Milaza ho tena lafo-vidy, nefa, mandalo dia miraikitra!
Toy ny mpivaro-tena, tsy mitoetra raha tsy vola!
Fo voahitsakitsaka io, nefa mbola sahy midola!

Ka indro, ny penina no asosasosa,
Hanontana pejy maro, nandoavam-po ny trosa!
Andraketana tantara, noterena holalovana!
Dia ny penina no akorisa, hitahiry fahatsiarovana!
Ny penina no hanefena, handrafetana amboara!
Izay amboaram-pahatsiarovana, rango-penin’ny tantara!

Fo voahitsaka io fa kosa, mbola afaka mitia!
Voatorotoro mihitsy angamba, fa tsy adala sanatria!
Eny, mety adala ihany anefa, fa adala noho lasa.
Tiany loatra ilay nandao, sy namela hola-dràtra.
RRAG
11 Jona 2012
--------