HO AN’I MADAGASIKARAKO… (RRAG)

HO AN’I MADAGASIKARAKO…
Ho anao ry Gasikara, tany mamiko indrindra.
Ho anao no hamafazako, izay tena tsara indrindra.
Ho anao no hitolomako, ho fanavotam-pirenena.
Ho anao ry Gasikara, hangina aho, fa mitenena!

Haringako ny mpioko, mpandravarava anao.
Potehiko ny sakana, mibahan-dalanao.
Dia ny fanafahana, no indro indray banjiniko.
Ny fandrosoanao, efa toa tsy diniko.

Hitsangana aho hiroso, hanafina kilema.
Ianao tsy maintsy handroso, tsy iandrasako ela.
Tsy maintsy mivoatra, ny fiainan’ireo vahoakanao.
Tsy maintsy mbola ho ravako, ny vesatry ny talaho.

Melohy aho, tsarao dia eo fonjao,
raha toa ka tsy vitako, ny dina izay natao.
Eo, fatory aho, ka aleo hizoga,
izay faram-besatra, mihidy ao am-ponja.

Ho an’i Madagasikarako, no hitenenako anio.
Ho anao ry nosy mamiko, ka indro tadidio.
Fa teny masina hafafy, haniry ho voa hotazana.
Hanamafy orina, anao ry tanindrazana.

Ka ho anao ry fireneko, ho anao irery ihany,
no nahasahiako nandatsaka, ity tomany,
manarona alahelo, noho ny zoganao.
Hangina aho, raha toa didianao.
RRAG
Aogositra 2012
--------