HOY NY FOKO…. (RRAG)

HOY NY FOKO….
Tsy ny hakantom-bikanao,
na ny fitafinao mihaja,
na koa ny toky hatolotrao,
sy ‘reo nambaran’ny vava,
no hitiavako anao,
fa ny toetranao ‘zay miavaka.
Hany tokana eto an-tany,
zary endri-nampiravaka,
tsy nampietry ireo ambany!

Hoy ny foko hoe:
“Tiako loatra akia ianao a!”
Hoy ny foko hoe:
“Tsy foiko mihitsy raha ianao a!”
Ilay fitilin’ny masoko,
fitopitopy sendra hontsa,
mpifahavalo amin’ny ankasoko,
nanohana ahy mba tsy ho votsa.

Na vara-datsaka aza handrava,
arahin’orambe hanototra.
Dia ny foko injao milaza,
fa tsy ho repotra na poritra,
ny fitiavako anao!

Hoy ny foko hoe:
“Sanatriaviko ny handao,
ity akany fitobiako,
raha toa ka mbola eo ianao,
izay tsy hafa f’ilay tiako”.
Ka hoy ny foko hoe:
“Tiako foana ianao”.
RRAG
Martsa 2012
--------