ILAY TALOHA…! (RRAG)
Mbola tsisy niantsa
(Nalaina tao amin'ny vetso.serasera.org)
ILAY TALOHA…!Firesakao matetika, ny zava-bitan’iny,
miteny ianao imbetika, tena lafatra izy.
Tia anao hoe ka, nahafoy zava-maro?
Tokana iny hoy ianao, ka sarotra atakalo.
Miloa-bava ianao dia, ny endriny mambabo,
izay teny aloakam-bavany, dia mampiravoravo.
Mamiratra ny soritra, eny an-tavanao,
tsapako anio fa, mbola tia azy ianao.
Tia azy ilay taloha, talohan’ny fisiako.
Raha azoko natao, dia avy nidifiako,
ny resakao mazàna, mandrotika ny foko.
Tsapako eto koa fa, tsy ho ela ianao ho hafoiko!
Fa tsy maintsy ho avelako, hamonjy azy indray,
na tsapanao aza ny any, fa ady mahamay,
noho ny fampirafesany, ilay hoe tsy zakanao.
Nefa tia loatra ianao ka, tsy misy azo atao!
Tsy misy hahasakana, fa ny hany azo ambara,
dia hoe, mahità ny soa, ary soava tsara.
Tiavo hatrany izy, izy ilay taloha,
fa izy angamba ry aiko, no anjaranao tokoa.
Ny hafatro anefa dia, aza mikaroka ahy.
Tsy haninona aho, fa aza mba manahy.
Tiavo fotsiny izy, dia ho sambatra aho.
Saingy ny am-poko, tsy ataoko ho fantatrao!
Avelao izaho, no zary ho ilay taloha,
mba nitondra ihany, na dia izay nahasoa.
Nahasoa ny anareo, ka dia veloma ianao,
fa tapitra hatreo, ny amiko sy aminao!
RRAG
11 Aprily 2018
--------
Rohy:
