IO NY ZANAKO… (RRAG)

IO NY ZANAKO…
Misavovona ao an-tsaiko, ry firenena tiako indrindra,
‘reo anatrao ‘zay nolalaiko, zary anatra mifindra.
Lova tokan’ny fitiavako, tsy mba sori-bolamena,
fa mba hoentiko hanasoavako, hanasoavam-pirenena.

Mitambesatra ao am-poko, ry tanindraza-nipoirako,
ny ady fitoloman-tsoa, nahitako ny mangirako.
Diary arakitro ho tantara, hosoratako amin’ny rà.
Diam-penina voazara, mahazo hatramin’ny fanahy.

Mitotongana amin’ny aiko, ratsy fatotra ny tsiny.
Aza hamatoran-tsombin’ny aiko, fa izy mbola mpivahiny.
Ry fireneko aleo zakaiko, hozakaiko ho ahy irery,
fa tsy ho tantin’ny saiko, raha izy koa ny ho voatery.

Ho voatery hizaka, ny hadalana izay niniako,
fantatra handràtra, nefa mbola fananiako.
Ry fireneko aoka re, aoka hilamina ny diany,
aoka izy hisafidy, izay lalana mba tiany.

Ataovy ho reharehany, ny tolon-draza-nifanesy,
farito ho fitandremany, aza avela ny ho lefy.
Aza avela halevin-taona, ny tantaram-pahafahana,
aza avela rehefa hisaona, ‘zay vao hisy famantarana.
Ry fireneko, reraka aho, nefa tsy hilavo lefona,
reraka aho ry fireneko, reraka ny mievina,
mitsiaro am-po ireo, zanakao resin’ny ady,
reraka aho, tena reraka sahady.
Ka io ny zanako jereo, omeo ana-pahendrena,
io izy dia tereo, hanao adidim-pirenena,
rehefa vonona hitraka, rehefa vonona hisedra,
raha tianao ny ho tompon-daka, amin’izato ady ‘ngeza.
RRAG
Jolay 2012
--------