IREO NO… (RRAG)
Mbola tsisy niantsa
(Nalaina tao amin'ny vetso.serasera.org)
IREO NO…Vetso sisa ity mitroatra, mikiky mafy ny ao anaty!
Tolo-namoizan’aina, fery nilona ka tsy tanty!
Indreo no re manery mafy, ny fo hitolona tsy fidiny!
Ireo no faka toa nandidy, ny fo handà izay safidiny!
Na dia tsapany ny fitepo, sy fidobo-po.
Na dia hita fa misento, vao mahatsiaro ireo taloha.
Dia toa hiniany hototofana, hovesaran’izay tsy zaka.
Dia mihevitra izy mantsy, fa ho tena tompondaka!
Tsiaro sisa fitanisa, sendra eo amorom-patana!
Toa angano feno arira, miafara hatrany am-pasana.
Ho levona eny toy ny lasa, noterena hohadinoina.
Ho faty hatramin’izay kinasa, foiny ny fo ilay voadona!
Ka na aloka hikapoka, hitanisa irony lasa!
Ka na fery te hidaroka, tsy mety ho vita sy ho fafa!
Dia toa minia misangevana, manosy ny hasina anaty!
Toa lavadava-pahaverezana, tsy fasana fa vatam-paty!
Vatam-paty mitahiry, ny lasa iriko hilevina!
Vatam-paty mitahiry, ireo tsiahy mampievina!
Izay mari-pahatsiarovana, ilay lasa zary tsiahy!
Toa ahiako hifongotra eto, ka hamboly ahiahy!
Vetso arahin-tsiaro, mitamberina misafo,
ny saiko nitahiry, ‘lay fery tsy mba maina.
Tsiaro arahim-betso, mikiky ny aty fo,
mandrava ny efa vitako, maningotra ny aina.
Ireo no sisa toa nitsiry, tsy nisy tondraka akory!
Ireo no hany mba nifoha, fa tsy nety resi-tory!
Nefa indrisy fa toa vesatra, toa hazo fijalian’ny aiko!
Ireo no entako mavesatra, ‘lay nankarary izato saiko!
RRAG
Aprily 2012
--------
Rohy:
