IZA ARY AHO? (RRAG)

IZA ARY AHO?
Tso-piaina tsy mba manana, harena mampiriaria,
voro-damba no fitafy, vorotra “fripérie”.
Bolongan-tany tsara tovana, no narafitra ho fonenana.
Hazo boboka efa lozotra, tsy mety angamba ny hitehenana.

Iza ary aho? Zana-dambo toa tantsaha,
miarin-doha, raha sendra lavo.
Tsy mba tia miahiahy,
raha mikiry mianika avo.

Zana-borondolo ihany, tsy mba manam-peo manga.
Tena zanatany, tena zanakao ry Moramanga.
Tsy mba manam-pahefana, entina miziriziry,
fa miasa aho vao homana, misasatra eny ka mikiry.

Tsy manaiky resin-tolona, raha tsy mbola vaky ady.
Matoky ny fon’olona, miditra eo am-bavahady.
Mankato raha toa mahatsapa, fa hahatsara ny paika.
Manao soa, tsy mila valiny, na dia tan-tsipaipaika.

Iza ary aho? ‘Lay maditrakelin-dReny,
mifamaly rehefa tezitra.
Avy eo mangina tsy miteny,
mitomany sy mihevitra,
fa manana ny rariny, manana ny mariny,
satria zazazaza ihany.

Iza ary aho? Tantely nefa toa tsy mamy,
sira tsy masira koa.
Tsy mba vokatry ny tany,
fa voary iray, ‘zay voka-po.
Ka iza ary aho, raha mba fantatrao?
RRAG
Jolay 2012
--------