IZA HOY NY FOKO IANAO? (RRAG)

IZA HOY NY FOKO IANAO?
Ry tovovavy be fihaingo, mibikàna an-damaody,
mirehareha fa mpitovo, alin’andro tsy mba mody.
Mba iza moa ianao, fa tsy mahalala setra tany?
Toa heverinao vinany, ireo nambaran-joky omaly.
Ry zazavavy be fidola, mpanadala vadin’olona,
manantena fa fiangola, no tena hitiavan’ny olona.
Mba iza moa ianao, toa nanantena ny tsy nisy?
Toa nihevitra ho tafita, nefa izy efa dify.

Ry voninkazon-tsaha maraina, ilay famelon’itsy tany,
vakio anio izay taraina, nosaronan’ny tomany.
Ka ny lasa hadinoy, raha tady handràtra ny ao anaty,
nefa aza tena hafoy, ireo tsara mety ho tanty.
Ry voninkazon’ny ala maitso, ny fidobo-ponao manaitaitra,
manery anao hitia mangina, nefa aza atao mahataitra.
Fa isan-tendrim-po izany, na dia tsy haharitra aza,
sy koa fitia kilalao, eny toa fitiavan-jaza.

Ry kanton-tany mody jamba, hianjera indray ianao,
fa tsy ny bika sy ny hamanjana, no mety hitiavany anao.
Mba ovao re ny toetra, mba mahalalà ny henatra olona,
fa sao hiampita vao taraiky, ka zary toa fihomezan’ny olona.
Ry zana-javatra mianjaika, aoka re ‘ty avonavona!
Iza moa no tsy hiaiky, ny hakantonao ‘zay mahafanina?
Manaitra mason’ny mpitazana, toa tohatra fiakapiakarana!
Vao boboka eo anefa ianao, dia izy tsy hita fa hiova lalana.

Mba iza moa ianao, hoy ‘ty foko manontany?
Mba iza moa ianao, miseho mahery eto an-tany?
Ny zatra ady aza, ora iray dia efa lavo,
ka izato ianao: “Moa hahanika ‘ty avo,
amin’ity fijery akaiky, tsy mahatazana ny ilavitra?”
Aiza ianao no tsy ho taraiky, raha mbola eto ambany lanitra?
RRAG
01 Aprily 2012
--------