JERY FARANY… (SAFIDY: 2012) (RRAG)

JERY FARANY… (SAFIDY: 2012)
Jery faramparany sendra mba nitopy,
nangalatra nitazana ny masonao nijery ahy.
Ny fitiavana nomeny no efa mba nafoiko,
saingy indrisy ny natolotro, tsy nasianao raharaha.

Jery farany famono fanantena,
kipy masokelin’ny toki-pandresena!
Kinanjo fingan-tsy nampoiziko,
fa ny fitiavana tanaty, no zary ngidin-todiko.

Jery farany miary, harika maneso!
Ianao ‘lay tiako mihitsy, no mihevitra ahy ho paiso!
Ka jery farany, mialohan’ny hifandaozana,
aminao ilay akany tsiarom-pilalaovana.
Jery farany mialoha veloma!
Teny farany mamarana fotoana,
arahan-datsalatsa, sy esoeson-teny!
Fandre efa mahazatra, raha ny toy ireny.
RRAG
26 Nôvambra 2012
--------