KOPA-TANANA… (RRAG)

KOPA-TANANA…
Indrisy fa veloma,
natao tan-dranomaso,
nandràtra fo voadona,
miendrika ankaso,
‘lay kopa-tananao,
talohan’ny hifandao!

Indrisy fa toa ora,
nisosa moramora,
toa haingam-pandalo,
mitoetra am-po mimalo,
nitahiry fery,
toa zary tsianjery,
‘lay kopa-tananao,
nilaza fa efa lao!

Indrisy sedra mafy,
mikiky ny anaty,
mandrava faniriana,
‘zay efa vita vina,
‘lay kopa-tananao,
fery navelanao!

Indrisy fa tomany,
mamatotra ny tany,
tsy zakam-po misento,
mo mbola iainako eto,
noho ‘lay kopa-tananao,
fambara fa hifandao.

Indrisy fa veloma,
nirona moramora,
nandrotika ny foko,
‘lay kopa-tananao,
ry ‘lay tsy foiko,
vao vantany nandao.

Raha toa anefa kosa,
ka iny kopa-tanana iny,
no tena hoe veloma,
hamaranana tantara,
dia ataovy an-tsaina tsara,
fa ny lahatra sy anjara,
no efa nisafidy,
fa tena sarobidy,
no sady lafovidy,
nefa tsy maintsy hafoy,
ka tonga dia hadinoy.

Raha toa koa ny tendry,
ka tsy mahay mikendry,
sy mitandro ny anjara,
famenon’ny tantara,
dia mba ‘lay kopa-tanana iny,
no harakitra ho tahiry.

Raha toa tsy azo ialàna,
ny lahatry ny anjara,
dia ekeko ny hitahiry,
ao an’efitry ny foko,
‘lay fitia vao nitsiry,
‘zay nanjary niova loko.

Raha toa ka an-tery,
no nanaovanao ireny,
dia hohadinoiko,
satria ianao tsy foiko.

Ilay kopa-tananao,
toa nofiko isak’alina,
reko nitalaho,
nefa nodiako ho fanina.
RRAG
Janoary 2012
--------