MATY ILAY MPANGATAKA… (RRAG)

MATY ILAY MPANGATAKA…
Omaly hariva, ilay fodian’ny masoandro,
no maty ilay mpangataka, ilay mpitanintanin’andro,
mitady izay mba ho haniny, sy ‘zay azony ho hateliny,
nifarana hatreo, ny ràtra zogam-periny.

Maty ilay mpangataka, tao atsinanan-trano.
Maty tamoron-dalana, fa tsy mba tra-drano!
Tsy nisy mpitomany, fa avy dia nalevina.
Asa any ho any, raha misy mba mievina!
Rafitra hazo boboka, no rafi-batapaty,
fantsika harafesina, no mitàna azy.
Lamba rovidrovitra, vita fato-maty,
no lamba nandrakofana, nandrakofana azy.
Vitsy ny mpandevina, fa hamaroan’ny alika,
telo lahy fotsiny, ireo mpiara-monina hita.
Tsy nisy na iray, mpivavaka mba tazana,
fa avy ery ilavitra, no hita niarangarana.

Voasitrika ny faty, ny alika no nanilika,
ireo ranon-tany, mba afaka hanadifotra,
ilay vata boboka, vao voatsindry dia efa repotra.
Raha niaina ny maty, angamba efa sempotra!
Vita ny fandevenana, lasa ny mpandevina,
ny alika no tavela, milahatra matevina,
dia miara-mitomany, mitomany valala!
Ny iray tanàna anefa, ninia ny tsy nahalala,
fa mpiara-monina amin’ity lavom-pasana.
Ny sasany aza, efa ela, no nivavaka azy ho lasana.
Maty ilay mpangataka, misaona ny alika,
ny mpiara-belona, mody tsy nahita,
dia nifetibe, nanao izay mba vitany.
Nefa, mety hianjera aminy, ny tody izay tsy hitany!
RRAG
Jolay 2012
--------