MBA HIROTSAKA KOA AHO…! (RRAG)

MBA HIROTSAKA KOA AHO…!
Vitan’irony ve dia tsy ho vitan’ialahy?
Hoy ny saiko, mandreby fanahy.
Taitra ny foko, dia nikiry nitroatra:
“Hirotsaka aho, hanasoa vahoaka!”

Ny tetik’asa tsy lainga, fa mbola tsy misy,
ny zava-bita, tsy nahefa na dia mba vitsy,
fa ny hambom-po, no manosika ahy hiroso.
Fokontany aza tsy hita, ka firenena no haroso?

Ny mpahalala koa, toa tena mbola vitsy.
Ny mpifanandrina raha teo, raha vava tsy hitsitsy.
Mba hirotsaka koa aho e! Tsy ahoako izany.
Amin’izay mba malaza, na dia indray andro ihany.

Fa ‘ty vola hirotsahana e! Aiza no hahita?
Ny trosa omaly aza, tena mbola tsy vita.
Efa hoavy hitaky eo izao, ingahy Randria,
marina mafy raha, tsy ho loza ity!

Mba hirotsaka koa aho, ho hitam-bahoaka.
Raha resaka asa a! Izaho tsy mitsoaka,
fa kosa ‘ty fingana, ho ataon’ilerony,
no tena tsy ho lanin’ny aty vavony.
RRAG
10 Aprily 2018
--------