NANANDO… (RRAG)
Mbola tsisy niantsa
(Nalaina tao amin'ny vetso.serasera.org)
NANANDO…Ny arahabanao maraina, anaty hafa-tarobia,
manome ‘reo tokin’aina, manambara ilay fitia.
Misy hantahantakely, miantso ahy hoe: “Nanando”.
Satriko io mba ho fiteny, fiantsonao ahy isan’andro.
Io no anaram-petaka, fiantsonao ahy indraindray.
Fony ianao mbola teto, Moramanga fahizay.
Nampaherezana ahy raha ketraka, hiorenako fanahy.
Mbola fanononao hatreto, ka mamelombelona ahy.
Ny velomanao hatory, arahanao ‘reo sangy kely.
Toa zary ody nampitony, nanafoana ny alahelo.
Tafandria mandry hoy ianao, anaty hafa-tarobia.
Izaho kosa hatramin’izao, manao veloma “Bonne nuit”.
Nanando, toa zary anarana tsy foiko.
Rehefa alina iny ny andro, dia io foana no kaloiko.
Satria io no hany sary, hatsiarovako anao.
Io koa ilay soratra an-diary, nisy diam-peninao.
Nanando, indraindray toa tara-draozy, mamela-mena midorehitra.
Fitazako maraina antoandro, nahafahan’ny masoko nihiratra.
Hoe: “Any anatinao any, misy fitia iray mangilatra”.
Nanando, moa tsy anarana napetakao o?
Saingy tiako, toa tsy foiko, eny tiako hatramin’izao.
Entiko aza indraindray, hivetsoiko irony kalo.
Tombo-kavatsam-pitia tsy may, noraketin-tononkalo.
RRAG
12 Febroary 2013
--------
Rohy:
