NAVADIKA NY PEJY… (RRAG)

Ny lohateny no niova,
fa ny tantara iny ihany.
Ka ny lasa izay nandroba,
no noraketin’ny omaly.
Saingy mbola misitery,
manita-pery tsy ho zaka.
Fa mbola misy tsianjery,
hola-pery voka-dràtra.

Ny pejy no vaovao,
fa ny tantara iny ihany.
‘Lay misy rango-peninao,
nametraka tomany.
Tao anaty ranomaso,
Izay tsiaron’ny omaly!
Mbola miendrika ankaso,
sisam-paty ve izany?

Na dia navadika ny pejy,
toa ny lasa lasa ihany.
Tanjona hafa no kinendry,
nefa ny omaly indray no tamy.

Ny lohatenin’ny tantara,
dia ny lasam-panenenana.
Toa voaozon’ny anjara,
hiforitra amim-pandeferana.
Na dia manimbanimba saina,
sy tsy zakazakan’ny aina,
‘ty ràtra lanjam-po mangina,
ka nanototra ‘reo voady,
izay efa vita dina,
fa hosoritina amin’ny hoavy!

RRAG
Janoary 2012
--------