NOFIN’NY LASA…! (RRAG)

NOFIN’NY LASA…!
Mafy tokoa, izany tia ka tsy tiana.
Ny afo ao am-po, tsy azo hamindroana.
Ny redaredany, maningotra ny aty,
nefa rivo-mandalo, dia mamono mahafaty!

Mandrava ny dina, izay nifanolorana.
Mandrotik’ireo vina, izay niloforana.
Niadiana mafy, ho fototry ny hoavy.
Saingy indrisy anefa, fa tinapaka tady.

Tapa-patorana, ny fitia izay najoro.
Malazo sy maina, toa fitia ampangoro.
Lefin’ny jery, izay diso tia vao,
dia rava tanteraka, ka niova lalao.

Ianao nifampitantana, no injay tinazany.
Ory ny fony, fa voafafa ny anarany.
Nofoananao, tan-tsegaondra vitsy,
ny fitia tsara toetra aza, dia zary efa dify.

Mangidy sira, aminy ny fiainana,
ianao ‘lay tiany, tsy azo hitarainana.
Fa dia nanadino, ireo mamy niarahana!
Ny anao no foana, fa ny azy tsy hifarana.

Mbola hitoetra, anatin’ny fony,
hiandry anao izy, hiandry anao hitony.
Ka hamerina indray, ny fitia lalim-paka!
Indrisy anefa, fa dia nofin’ny lasa.
RRAG
09 Aprily 2018
--------