NOFY IZANY… (RRAG)
Mbola tsisy niantsa
(Nalaina tao amin'ny vetso.serasera.org)
NOFY IZANY…Mitamberina anio, irony tsiahy nitondra ràtra,
misavovona avokoa, ny tantara nentin-dasa,
ilay nanitatra ny fery, izay nanataka ny zaitra,
nozogainao tan-tery, na dia tsapa fa tsy laitra,
sady toa tsy zakanao, toy ny tsiny mitambesatra,
ry fireneko aoka izao, aoka izao raha tena vesatra.
Aleo lanjaiko ny fidodo, raha hamatotra anao,
fa ny hoavy, no ‘ndeha atao hiroborobo, ho an’ireo vahoakanao.
Aleo zogaiko raha mavesatra, ‘ty zoga iambozonanao,
aleo entiko sao reraka, ka tsy hahavita adidy intsony ianao.
Ry fireneko, ireo madinika, hampitao ilavidavitra!
Ireo mpitondra mba tahio, raha toa ka niezaka nanavotra,
fa azerao ho potraka eo, ireo ninia ny nandrava,
fatory mafy ihany koa, izay nanao tokim-bava.
Ka tsy nahatanteraka akory, ny dina tokana nambara,
faizo ireo hamirifiry, dia hamaizino ny anjara,
‘zay hantenainy aminao, ry fireneko Gasikara.
Alao tanteraka ny anarany, fafao anatin’ny tantara.
Ry fireneko meva indrindra, vesatra ho ahy ny mangina,
raha mahatsapa fa safidy, no namotehana ny dina,
ilay nifanaovanao sonia, tamin’ny razambe fahiny.
Saingy indrisy, ry fireneko, fa nofy izany ankehitriny!
RRAG
Jolay 2012
--------
Rohy:
