NY ALIKO… (2012) (RRAG)
Mbola tsisy niantsa
(Nalaina tao amin'ny vetso.serasera.org)
NY ALIKO…Raha hisoka-bava aho, moa hodisoina ny teniko!
Raha saronana ahiahy, dia ho hafenina ny peniko!
Nefa ity no tsy tsarovy, fa ny aliko mangina,
tsy noho ny ranomaso akory, na miondri-pahoriana,
fa minia tsy miteny, minia tsy miloa-bava,
ka ny alin’ny ampitsoko, no haneho ilay mazava.
Ny aliko na haizina aza, toa mitaratra hazavana!
Ny lasako ‘zay maizim-bava, tsy hoe lasan’hadalana,
fa ao ihany irony tsara, toa kinafinafin’ny hoaviko!
Nahitako ilay anjara, nampiakariko ho vadiko.
Ny sentoko toa maivamaivana, fery mainan’ny fitia!
Ny lasa izay famaizana, tsy nihombo ho ràtra sanatria,
fa toa zary fanafody, nanasitrana ny feriko.
Zary amboara nenti-nody, namafana irony neniko.
Ny aliko tsy harena, fa fananana tsy foiko!
Io no alim-pandresena, taratry ny tena toloko!
Ka na ny tsy hita sy tsy vita, nofy fotsiny anio,
fa ny aliko niampita, no nandresy ilay tadio!
Ny aliko, toa fisetran’olon-dratsy,
misokosoko moramora, ka harabi-mpanaratsy.
Nefa tsy voahozongozony, na matanjaka aza izy,
fa ny lasany indray, no zary kapoky ny tadidy.
RRAG
30 Martsa 2012
--------
Rohy:
