NY FOKO… (RRAG)

NY FOKO…
Ny masoko jamba, fa ny foko mahita,
misento, ka faly mahatazana anao!
Ny kilema ananako, tsisy mpahita,
ka ny foko mitepo, vao akaikinao!

Ny masoko no jamba, fa tsy mba ny foko.
Ianao ‘lay tiako, no zary tompoiko!
Ekeko hoe mainty, ny lokom-pitiavako,
saingy izay ataonao, dia hihafiako rahavako!

Ny ranomasoko tsisy, fa toa zary maina.
Ny fery anatiko, manindrona aina!
Tsy haiko hoe iza, no afaka hitarainako?
Dia aleoko mihafy, hampitony ny fisainako.

Ny fery ao anatiko, mihitatra hatrany.
Ny ranomasoko, tsisy fa lany.
Aleoko mangina, tsy hihombon’ny ràtra.
Ny zoga lanjaiko, toa fery mahazatra.

Ny masoko jamba, ny foko mahita.
Mitsapa mangina, ny endrikao sariaka!
Endrika maneho, fitia lalim-paka.
Mientana am-poko, ka maka laka!
RRAG
30 Janoary 2010
--------