NY FOKO… (2012) (RRAG)

NY FOKO…
Misento mitomany,
manina anao.
Injay fa manontany,
ny tena misy anao.
Nefa, tsy mba nahita valiny,
na niezaka aza!
Toa tsy nahita maminy,
na dia nitia mazava!
Ny foko tianao,
tsy henatra intsony.
Nefa sahinao,
sahinao ny nilaza,
fa mbola resi-tory,
toy ny zaza.

Ny foko ve no maika loatra?
Sa izy mihitsy no adala?
Fa maniry ny hitroatra,
sy hiantso anao malala.

Ny foko ve no diso tia,
ka nahandry anao tsy ho tonga?
Sa ianao ilay niara-dia,
tsy anisan’ny ho anjara lova?

Ny foko ve no tena jamba,
ka mila anao hatrany?
Nefa toa rovi-borodamba,
izany hatafinao ahy izany.

Hiandry ihany aho,
sao anefa ho tonga ianao.
Hiandry ihany aho,
fa mbola manantena anao.
RRAG
Febroary 2012
--------