SANTATRA...! (RRAG)

SANTATRA…!
Nisy fiandohana tsy takatry ny saina,
nahariana ny tontolo,
ny zavatra maniry sy ny manan’aina,
hita teo daholo,
misy misitery sarotra takarina,
mitoetra anaty fo,
fihetsika nitsiry fa tsy namboarimboarina,
fony vao niandoha.

Moa tsy voa nafafy, no zary lasa vary,
famelombelon’aina?
Toa asa loatra lahy, fa ny hevi-tera-bary,
no nampitony saina,
rehefa sendra, ‘lay fitepo am-po,
mahalasa eritreritra,
ny hany azo atao, dia ny mihazon-doha,
na koa manidy ny efitra.

Dia ao no manembona, ‘ty santatra fitia,
nambabo vao hoe tazana,
ao no mivetso, ny ho tafara-dia,
na koa mba hiara-dalana,
dia ‘njay! Mitroatra mafy indray,
ka vaky sento lalina,
toy ny vainafo, ‘zay tena mahamay,
voahitsaka tsy malina.

Santatra fitia, miredareda mafy,
ay! Misetrasetra loatra,
injany! ‘Ty fo re toa tsy hahatanty,
ka hikiry ny hivoaka,
tsy afa-mampitony ny fisefosefony,
an-tontolo mbola vao,
tsapao! Izany no fitepony,
izany! Raha toa tsy fantatrao.

Nisy fitsiriana vao afa-nioty vokatra,
ireo niandrandra izany,
fa ‘ty santatra fitia e! Satry tsy hanolatra,
ka hitondra indray tomany,
ny irina hiroborobo, tsy ho fatin-tsedra tokana,
sy ireo mpialona azy,
ka indro sombiny, miendrika haingon-tsoratra,
ho atao fatoran-tady.

Hihazona ‘lay santatra,
ho zary fiafarana, an-jaridaim-pitia,
ka hiezaka ny hamantatra,
‘zay tena hifamatotra, am-ponao ho doria.
Hikolo izato raozy, ka hanondratondraka azy,
hiaina hatsarana,
dia mba hitondra tsiky, ireo misantatra azy,
nandika fahazazana.

Sendra fahatanorana, tsy in-droa dinganina,
fa tokana mandalo,
santatry ny fiainana, tsy hoe nila-niomanina,
fa toy irony kalo,
tonga tsy mampilaza,
satria avy any am-po, no niaingan’izany,
veloma ilay fahazaza,
f’izahay sy ny fitia, dia tsy tamana tany!

Samy niezaka namonjy, ‘ty santasanta-dia,
fanorenana ny hoavy,
lasa e! Namonjy ny aty,
veloma mampamangy,
ka ’ty tontolo vao, mbola tsy nodiavina,
aleo re mba santarina,
fitia vaky ravina,
tsy hiverina eo ve, raha sendra hoe ka fanina?
RRAG
12 Aogositra 2018
--------