TENA IANAO MIHITSY… (RRAG)

TENA IANAO MIHITSY…
Tena ianao mihitsy, ‘lay tazako omaly,
tsy nahita ahy akory, toa diso falifaly,
miramira-misakambina, izato olon-tianao,
dia sahy nanosihosy, ireo dina izay natao.

Asa, izay angamba, no hany tendrin-dahatra,
hatreo! Hatreo ny antsika, dia tsy maintsy atsahatra,
sao ho fery iray hilona, handoto rivo-pahasambarana,
dia tena hatreo! Hatreo tokoa lahy no hifarana.

Tena ianao mihitsy, ilay tazako nidola,
teny an-tratran’olon-kafa, toy irony olo-maola,
tsy mba menatra mpitazana, eny! Na dia kely ihany aza,
aleo hatreo mihitsy aloha! Ny amintsika dia ho rava,
fa sao tantara diso lava.

Fa tsy ho tantiko ny hiaina, eo anoloan-jaridaina,
izay tsy misy fitiavana, fa hany tany karakaina,
feno ahitra efa mavo, sy fela-maro efa malazo.

Tena ianao mihitsy, ilay tsinjotsinjoko iny,
efa zatrazatra ady, fa tsy mbola mpivahiny.
Miriaria fatratra, mihevitra avy dia tafita,
tsy mba mijery akory, ‘ty sedra iray tsy vita,
sarotra hiampitàna, fa tetezan-kazo boboka,
raha tsy mahay mitàna, dia mety hidaraboka.

Tena ianao mihitsy iny, na dia tsy tena tazako aza,
tsaroako, ilay volonao ‘zay lavalava.
Matetiteti-misaritaka, manaronarona ny tava,
teny ianao mihitsy iny, fa dia toa nahavaky vava.
RRAG
Jolay 2012
--------