TSY MBA ANGANONGANO… (RRAG)
Mbola tsisy niantsa
(Nalaina tao amin'ny vetso.serasera.org)
TSY MBA ANGANONGANO…Injay ‘lay feo malefaka, toa miritsoka ato anaty,
mandalo hanala vesatra, fa tsy handoro ny anaty.
Izay ‘lay hiram-pireneko, fihirako isa-maraina,
io no foto-pahendreko, noraketin’ilay saina.
Dia ‘lay sainam-pireneko, mitondra loko telo miavaka,
rarinà fotsy manodidina, sy kofehy enti-mandravaka.
Enti-manambatra ny loko, fotsy mena maitso,
‘zay fiandrihanan’ilay Nosy, Nosikely nosy maitso.
Fotsy, fahadiovam-po miray,
miendrika firaisankina.
Taratasy tsy mba may,
misy dinam-pitokiana.
Mena, rà nalatsa-pahavalo,
fandresen’ny nosy mamiko.
Zary lasa kalokalo,
‘lay hoe: “Masina ny taniko”.
Maitso, fanantenako anaty sedra,
hireharehako, ny maha ‘ngeza,
ny fototrao ry fireneko, dia ny fanavotana,
ny madinika indrindra, izay niniana nahosim-potaka.
Ho anao hatrany ry Nosy, no hitenenan’ity vavako.
Ho anao hatrany ry Nosy, no nahatonga ny fandàvako.
Handao anao irery, hisidina any ampita.
Tsy maintsy eto aho, satria mbola tsy vita,
ny adidiko aminao, na tsy nataoko velirano,
ho ataoko izany, fa tsy mba anganongano.
RRAG
Jolay 2012
--------
Rohy:
