VAVAHADY TOKANA… (RRAG)
Mbola tsisy niantsa
(Nalaina tao amin'ny vetso.serasera.org)
VAVAHADY TOKANA…Varavaran-tokana, no nidirako tao!
Fanalahidy tokana, no nanokafako, ny fonao.
Nahafahako nandroso, tsy nisy fihafahafana.
Nahafahako niroso, na dia sedra iray malama,
mety handrendrika ahy, ny fitiavanao!
Dia ny foko efa adala, mila anao, mila anao.
Vavahady tokana, ilay nakaratoko vao niditra.
Fanalahidy tokana, dia ‘lay very tsy tadidy,
fony aho niroso niditra, namonjy ny efitra.
Efitry ny fitiavanao, izay tena lafovidy!
Vavahady iray manokana, natokanao ho ahy irery,
misy mpialona mitazana, misy mpifosa iray mijery.
Fa tsy hataoko hampihemotra, ny fo hanatona anao.
Maika aho! Maika mafy! Faly loatra hahitanao.
Ny vavahady tokam-poko, dia ‘lay fitiavana tsy miova.
Ny fitiavan-tokan-doko, natao ho anao ilay rova,
izay najarin’ny nahary, fa natokana ho ahy.
Tsara voatra, tsara jary, manana halemem-panahy!
RRAG
21 Jona 2012
--------
Rohy:
