PÔZITIVA (NY HERIMAR)

PÔZITIVA

Fa lany vorona ve moa ny tany
No vorompotsy sisa ompiana?
Akohokely efa tamana any
No kotrehina mafy sy hampodiana?

Topazo maso ery ambony amotana
Fa feno tsorohitra mihira ny ho avy;
Ny tranony amin'izany tsy mba mikorotana,
Ianao eo anilany tsy mba manavy.

Aza mitsiritra manenjika lolo,
Tondraho ny paiso ho raiki-pelana;
Ny ety ange ka mora bobongolo,
Ny zava-drehetra mandalo miserana.

Tetsy izao taloha, tany karakaina,
Tsisy mpialokaloka, nataon'olo lalana;
Fa rehefa nisy raozy, lasa zaridaina,
dia tonga toy ny lolo ireo tapaka sy namana.

Ka maninona Sakaiza no tsy faly ianao,
Amin'izay voatsinampy nafafinao teto?
Araho finoana fa dia ho tsapanao
Izany fiadanana ambadiky ny sento!

NY HERIMAR
2023
--------