TSY NY OMALY (NY HERIMAR)
(Nalaina tao amin'ny vetso.serasera.org)
TSY NY OMALY... Ny nenina tokoa fanafody mahavery,
Mampamisavisa ny nilaina fahiny;
Ny zavatra aterany manampy 'reo fery,
Mampameno toloko ny ankehitriny.
Raha tsapanao tsy ampy ny ezakao omaly,
Tsy manamelon-tena fa tsisy tonga lafatra;
Na eo ireo latsa mandrehitra afonjaly,
Ny lesona no tsoahy, tsy adino ireo hafatra.
Ianao mandroso foana no zava-dehibe,
Ny lasa sakaiza tsy azonao amboarina;
'reo fomba ratsy ihany no avelao r'ise
Fa ny tsara hatrany ezahina takarina.
Tsy ny lasa omaly no hamaritra ny ho avy,
Tsy ny tsiky anio no midika fahasambarana;
Ny olona mahia izao mety hatavy,
Ireo mahantra miezaka koa mbola hanana.
Koa aza variana amin'ny hoe tahak'izay,
Atody vaky tsy misy fanafanana;
Efa zava-dehibe ilay mahatsiaro fay,
Avia mitsangana, mbola lava ny lalana.
NY HERIMAR
10/07/2023
00:42
--------
Rohy:
Mpakafy:
Herimar
