You are here: home > Vetso

NY HERIMAR

Jean Marcel RASOATAKALOSOANDRO no tena anarany. Teraka ny 11 May 1997 tao amin’ny efitranom-piterahana Nasandratrony Fianarantsoa izy. Zanak’i Bienvenu Jean Marcel RAMBELOSON sy Dorothée HERINIRINA, izay samy tantsaha mpamboly monina ao Ampatsakana Nasandratrony, ambanivohitr’i Fianarantsoa. Zaza fahatelo izy, efatra mirahalahy izy ireo no zanak’ireo ray aman-dreniny. Nanomboka nianatra tao amin’ny sekoly tsy miankina EPC Tomboarivo Nasandratrony ny taona 2002 ka hatramin’ny taona 2009. Nanohy ny fianarany tao amin’ny sekolim-panjaka CEG Nasandratrony nony nahazo ny CEPE. Voaray ho mpianatra tao amin’ny CERES Nasandratrony ny volana Novambra 2009. Nahazo ny mari-pahaizana BEPC ny taoana 2013 ary nianatra tao amin’ny Taom-panomanana CERES Ankofafalahy Fianarantsoa. Nahazo ny laharana voalohany tamin’ny fifaninanana kabary nataon’ny CERES ny taona 2014. Nanohy ny fianarany tao amin’ny KMFX (Kolejy Masindahy François Xavier) Ambatomena Fianarantsoa ny taona 2O14. Nanomboka nanoratra tononkalo izy ny taona 2015, ilay tononkalo mitondra ny lohateny hoe: “NY LASA”. Ny sombintantara nosoratany voalohany ihany koa dia ilay hoe “Ngidim-pitia”. Tia loatra ny ohabolana sy ireo fomba fiteny samihafa izy ka nianatra kabary tao amin’ny SEKOLY LASALIANINA MIKABARY Fianarantsoa ary nahazo ny mari-pankasitrahana “Tena Tsara indrindra” ny taona 2016. Nanohy ny sampam-pianarana siantifika izy ary nahazo ny mari-pahaizana bakalorea ny taona 2017, tao amin’ny Kolejy KMFX, mari-pankasitrahana "Tena Tsara". Afaka tamin’ny fifaninanana hiditra tao amin’ny SESAME ihany koa ny taona 2017 ary nanao taom-panomanana tao ny taona 2017-2018. Nahazo vatsim-pianarana tany Maroc izy ny volana Aogositra 2018, hanaraka fiofanana ny fitsaboana amin’ny ankapobeny na "médecine générale". Noho izany dia nanomboka nianatra tao amin’ny Faculté de Médecine et de Pharmacie Fès Maroc izy ny volana Oktobra 2018. Mbola tsy Manambady. Amin’ny maha mpanoratra ny tenany dia misalotra ny solon’anarana hoe “ NY HERIMAR” izy. Tsy dia misy antony firy loatra hoy izy io solon’anarana io fa mba ho fahatsiarovany ilay namany MamiHERIlanto. (HERI+MAR), ny MAR dia nalaina tamin’ny Marcel. Samy solon’anarany avokoa na Ny Herimar na Ny Herimaro na "NY H."

Hametraka hevitra

Midira aloha