You are here: home > Vetso

MANANTENA - Ravanondrazana

Azo vakiana?

MANANTENA

Raha mbola tsy ritra ny ranon'alaotra;
Raha masina fomba sy sompitra vary;
Alaotra mangoro tsy maintsy mivoatra.

Raha mbola milatsaka ihany ny orana;
Raha misy tso-drivotra omen-janahary;
Tsy ho ripaka izany ny rasy olombelona.

Raha mbola hoe misy ny andro sy alina;
Raha misy fihodinana afaka handamina;
Tsy maintsy mba hisy maraina vaovao.

Raha efa mipetraka izay vao mandady;
Raha efa mandady vao miana-mandeha;
Tsy maintsy lalovana ny ambaratonga.

Raha tia sy ny tiana: mikasa hiara-dia;
Raha tonga tomany, nateraky ny onja;
Tsy maintsy misy ihany ny todim-pitia.

Raha mbola hoe misy ny zaza hateraka;
Raha vonona hanitsy ny fiaraha-monina;
Tsy maintsy mijoro ny tia tanindrazana.

Raha misy eto an-tany ny tena fitiavana;
Raha mbola ho nofo ny fon'olombelona;
Tsy ho foana tsy akory ny fanantenana.

Na mafy ny sedra sy fiainana an-tany;
Ny areti-mandringana mandrak'androany.
Raha misy ny ankoatra ho làlan-kombana;
Tsy ho foana tsy akory ny fanantenana.

RAVANONDRAZANA
04 AVRILY 2021

Mombamomba

Mpanoratra : Ravanondrazana

Nampiditra : Ravanondrazana
Daty : 10/04/2021
Mpamangy : 123
Mankafy : 0

Tononkalo hafa

ZANAKA MPANOTA
MAINTY
TSINGERIN-TAONA
POETA
DINGAM-PISARAHANA
MAHAGAGA
HO AN'I ZANAKO
OROKA VOALOHANY
MIFONA
SIGARA